सयपत्री फूलको खेती बढ्दै

काठमाण्डाै। तिहार नजिकिँदै गर्दा देशका विभिन्न ठाउँमा सयपत्री, मखमली र गोदावरी फूल ढकमक्क फुल्न थालेका छन् । तिहारमा विशेष गरेर सयपत्री, मखमली र गोदावरी फूलको प्रयोग  हुन्छ । त्यसमा पनि सयपत्री फूलको प्रयोग बढी हुन्छ ।

मखमली र गोदावरी फूल स्वदेशकै उत्पादनले पुग्ने भए पनि सयपत्री फूल भने भारतबाट समेत आयात हुने गरेको छ । तर बर्सेनि सयपत्री फूलको खेती बढ्दै गएकाले आयात घट्न थालेको फ्लोरिकल्चर एसोसिएशन अफ नेपाल (फ्यान) ले जनाएको छ ।

फ्यानका अध्यक्ष मीनबहादुर तामाङका अनुसार यसवर्ष मागको ८० देखि ८५ प्रतिशत सयपत्री फूल स्वदेशी उत्पादनले पुग्ने सम्भावना छ । देशभित्रै खेती विस्तार भएकाले सयपत्री फूलको मागअनुसार उत्पादन हुने अवस्थामा पुगेको उहाँले बताउनुभयो ।

यसैबीच यस वर्ष तिहार ढिलो भएका कारण कतिपय ठाउँमा सयपत्री र मखमली फूलहरू सुक्न थालेका छन् । यस वर्षको भाइटीका केही ढिला परेकाले अघिल्लो वर्षकै समयमा फूल रोप्नेहरु समस्यामा परेका हुन् ।

चाँडै टिप्नुपर्ने सयपत्री फूल बढीमा एक हप्तासम्म मात्रै भण्डारण गर्न सकिने व्यवसायीहरु बताउँछन् । फ्यानका अध्यक्ष तामाङले कोल्डस्टाेरमा बढीमा ५ देखि ७ दिनसम्म मात्रै फूल भण्डारण गर्न मिल्ने बताउनुभयो । चाँडै फुलेका फूल बिक्री गर्नुपरेमा फ्लोरिकल्चर सहकारी संस्थाले पनि सहयोग गर्ने भएकाले सम्पर्क गर्न उहाँले अनुरोध गर्नुभएको छ ।