माझी गोल्डकपमा समाचार संकलन गर्न पुगेका मकवानपुरे दिक्षान्स खड्का कुटिए

हेटौंडा । सिन्धुलीको मरिण गाउँपालिका ७ बाह्रबिसेको खेल मैदानमा जारी ‘तेस्रो माझी राष्ट्रिय गोल्डकप’ फुटबल प्रतियोगितामा समाचार संकलन गर्न पुगेका मकवानपुका खेलपत्रकार दिक्षान्स खड्का कुटिएका छन् ।

आइतबार दिउँसोको खेल सकिएपछि नेपाल माझी उत्थान संघ, ओखलढुंगाका फुटबल खेलाडी प्रभाकर माझीले आफूमाथि कुटपिट गरेको खड्काले बताए ।

उनले खेलाडी माझीले खेलको प्रत्यक्ष प्रसारण (लाइभ) राम्रो नआएको भन्दै खेल सकिएपछि सिधै आएर हातपात गरेको बताए ।

उनले माझीको कुटपिट पछि आफ्नो देब्रे आँखामा समस्या आएको र स्थानीय स्वास्थ्य संस्थामा सामान्य उपचार गरिएको बताउँदै अझै आँखामा समस्या रहेको समेत बताए ।

आफ्नो टिमका सदस्य सलार्हीका नवीन निरौलामाथि पनि हातपात भएको खड्काको भनाइ छ । उनले हातपात गर्ने माझीलाई नियन्त्रणमा लिएर आवश्यक कारबाही गर्न माग गरेका छन् ।

यसैबीच, मिडिया नेपाल मकवानपुरले खड्कामाथि भएको कुटपिट घटनाको ध्यानाकर्षण भएको जनाएको छ ।

मिडिया नेपाल मकवानपुरका अध्यक्ष जिवराज बख्रेलले एक प्रेस विज्ञप्ति जारी गर्दै खेलको प्रत्यक्ष प्रसारण गरिरहेका पत्रकारमाथि कुटपिट गर्ने खेलाडीमाथि छानबिन गरी तत्काल कारबाही गर्न माग गरेका छन् ।