सरकारको प्रभावकारी कदम चाल्दा कोरोनाले क्षति भएन: प्रधानमन्त्री
काठमाडौं:- प्रधानमन्त्री केपी शर्मा ओलीले कोरोना रोकथाम तथा नियन्त्रणमा सरकारले चालेका प्रभावकारी कदमले क्षति नभएको बताएका छन्।
सरकारले चालेका प्रभावकारी कदम, सम्बद्ध सबैको रचनात्मक सहयोगले कोरोना संक्रमणबाट हालसम्म नेपालमा कुनै पनि मानवीय क्षति नभएको प्रधानमन्त्रीको भनाइ छ।
‘यस महामारीबाट विश्वभरि ज्यान गुमाउने सबैप्रति म भावपूर्ण श्रद्धाञ्जली र संक्रमित सबैको शीघ्र स्वास्थ्यलाभको कामना गर्छु,’ बिहीबार जारी भिडिओ सन्देशमा प्रधानमन्त्रीले भनेका छन्, ‘विश्वव्यापी साझा प्रयास र एकताको बलमा यस महामारीलाई परास्त गरी मानव समुदायको जीवनरक्षा गर्न सफल हुनेमा म विश्वस्त छु।’
कोरोना महामारीविरूद्ध जुध्न र मानवताको पक्षमा ऐक्यबद्धता प्रदर्शन गर्न बुद्धजयन्तीले थप प्रेरित गरिरहेको समेत उल्लेख प्रधानमन्त्रीले उल्लेख गरेका छन्।
२५६४ औं बुद्धजयन्तीका अवसरमा शुभकामना सन्देश दिँदै प्रधानमन्त्रीले अन्तर्राष्ट्रिय प्रतिष्ठा, प्रख्याति र पर्यटन विकासमा लुम्बिनीको विशेष महत्व रहेको बताएका छन्।
संयुक्त राष्ट्रसंघको संलग्नतामा तर्जुमा गरिएको लुम्बिनी विकास गुरूयोजनाको कार्यान्वयन भइरहेको भन्दै उनले विश्व शान्ति, मानव कल्याण र अहिंसाका प्रणेता गौतमबुद्धप्रति सम्मान व्यक्त गरेका छन्।
विश्व कोरोनाको संक्रमण र महामारीबाट प्रभावित नभएको भए अन्तर्राष्ट्रिय बौद्ध सम्मेलनको भव्य आयोजना गरिरहेका हुने थियो भन्दै प्रधानमन्त्री ओलीले त्यस अवसर र सफलताबाट हामी बञ्चित हुनुपरेको बताए।
‘गत साल भियतनामको हनोइबाट यसको घोषणा गरे बमोजिम अन्तर्राष्ट्रिय वैशाख दिवसको तयारीमा लागिरहेका हुने थियौं,’ प्रधानमन्त्रीले भने, ‘नेपाल भ्रमण वर्ष २०२० को एउटा महत्वपूर्ण कार्यक्रमका रूपमा लुम्बिनी चहलपहलमय हुने थियो।’
यो पनि पढ्नुहोस्
