कैलालीमा हराइरहेका प्रहरी जवानको शव गाडिएको अवस्थामा फेला पर्यो

बाग्मती खबर
४ कार्तिक २०७७, मंगलवार १३:५०

तस्करहरुले हत्या गरेर खालामा फ्यालिएका प्रहरी जवान रामबहादुर साउँदको शव आज भेटिएको छ । उनलाई खोलामा गाडिएको अवस्थामा भेटिएको हो । साउदको शव नजिकै हराइरहेको पेस्तोल पनि फेला परेको छ। उक्त चाइनिज पेस्तोल प्रहरी सहायक निरीक्षक गोविन्द विकले बोकेका थिए।

सुदूरपश्चिम प्रदेश प्रहरी प्रवक्ता एसएसपी मुकेश सिंहका अनुसार विकको शव भेटिएको ठाउँबाट दुई सय मिटर उत्तरपश्चिममा जवान साउँदको शव भेटिएको थियो। शवनजिकै विकले बोक्ने गरेको पेस्तोल भेटिएको सिंहले बताउनुभयो । प्रहरीले पक्राउ परेका एक व्यक्तिको बयानका आधारमा जवानको शव भेटिएको प्रहरी स्रोतले बतायो।
‘पक्राउ परेका व्यक्तिलाई सँगै लिएर गएपछि उनले देखाएको ठाउँ खनेर हेर्दा प्रहरी जवानको शव फेला परेको हो,’ स्रोतले भन्यो।

धनगढी उपमहानगरपालिका १२ स्थित प्रहरी चौकी जुगेडामा कार्यरत् विक र साउँदलाई तस्करको समूहले हत्या गरेको प्रहरीको प्रारम्भिक निष्कर्ष छ।

असई विक र जवान साउँदलाई उस्तै प्रकृतिले हत्या गरिएको देखिएको छ। साउँदको पनि घाँटी रेटिएको अवस्थामा शव फेला परेको हो ।